Një deklaratë që të sjell ndër mend kohën e autokritikave dhe fletë-rrufeve është publikuar nga drejtori i Njësisë Administrative Orikum, Drini Harizaj, i cili ka zgjedhur të kërkojë ndjesë publike për një shkelje të rëndë disiplinore: Ndezjen e një cigareje në zyrë.
Në një tekst të gjatë, me tone të denja për një seancë reflektimi kolektiv, Harizaj shpjegon se tensionet e krijuara gjatë transferimit të dokumenteve të gjendjes civile e çuan në një moment dobësie emocionale, ku, në kundërshtim me normat e institucionit, konsumoi një cigare.
“Jam i ndërgjegjshëm se rrethanat nuk justifikojnë mosrespektimin e rregullave”, shkruan drejtori, i cili më pas kërkon falje ndaj institucionit, drejtuesve, kolegëve dhe kujtdo që mund të jetë tronditur nga tymi i duhanit.
Në mungesë të një fletë-rrufeje në murin e ndërmarrjes, autokritika është postuar në Facebook, duke rikthyer nostalgjinë e kohëve kur gabimet në punë shlyheshin me pendesë publike dhe premtime solemne se “situata të ngjashme nuk do të përsëriten në të ardhmen”.
Mbetet e paqartë nëse pas deklaratës së pendesës drejtori do të rehabilitohet plotësisht apo do t’i duhet të shkruajë edhe një ese mbi dëmet ideologjike që sjell konsumimi i nikotinës në administratën publike.
