Teksa Partia Demokratike prej javësh kërkon praninë e Edi Ramës në Kuvend, kryeministri u shfaq në seancën e pasdites pikërisht në momentin kur mazhorancës i duheshin 84 vota për të miratuar ligjet që kërkojnë shumicë të cilësuar.
Por më shumë se presioni i opozitës, rikthimi i Ramës në sallë u diktua nga aritmetika e brishtë e mazhorancës. Mungesa e deputetes Marjana Koçeku, e larguar tashmë nga grupi parlamentar socialist dhe e afruar me protestën qytetare, e ka vënë PS-në në vështirësi për të siguruar numrin e nevojshëm të votave. Edhe ish-zëvendëskryeministrja Belinda Balluku mungoi në seancën e së enjtes, duke e bërë të domosdoshme praninë e kryeministrit.
Me mbështetjen e votave të Partisë Socialdemokrate të Tom Doshit, socialistët arritën të siguronin 84 votat e nevojshme dhe të miratonin ligjin për amnistinë penale. Nga amnistia do të përfitojnë qindra të dënuar, ndërsa personat dhe veprat penale nën juridiksionin e SPAK përjashtohen.
Nga ana tjetër, Partia Demokratike nuk ishte në sallë as për të votuar amendamentet e propozuara nga Jorida Tabaku. Pas përplasjes tashmë rutinë të çdo jave, deputetët demokratë vendosën të mos riktheheshin në seancën e pasdites, pa dhënë asnjë shpjegim zyrtar për arsyet e bojkotit.
Kështu, opozita mungoi pikërisht në seancën ku Edi Rama, prania e të cilit ishte kërkuar me ngulm prej javësh, u rikthye në Kuvend dhe siguroi votën e 84-të për mazhorancën.
