Ministri i Turizmit, Kulturës dhe Sportit, Blendi Gonxhja, ka gjetur një mënyrë të re për të matur legjitimitetin politik: kalkulatorin e votave personale. I ftuar në emisionin “Puls” në A2CNN, ai argumentoi se nuk mjafton që 30 mijë qytetarë të dalin në rrugë dhe të kërkojnë largimin e kastës politike, pasi vetëm ai, si deputet, ka rreth 25 mijë mbështetës.
Me tone pajtuese, Gonxhja tha se protestuesit duhen respektuar, por paralajmëroi se nuk mund të vendoset standardi që sa herë mblidhen 20 apo 30 mijë veta në shesh, qeveritë të largohen. Sipas tij, zgjidhja duhet të jetë politike dhe brenda rregullave të demokracisë.
Ministri pranoi se mes protestuesve mund të ketë edhe votues të tij, madje i cilësoi si “nga më të mirët”, por kujtoi se një pjesë e mbështetësve të tij nuk ndodhen në shesh. Duke lënë të kuptohet se, nëse matematika e votave personale do të bëhej standard politik, atëherë çdo deputet mund të hynte në debat me tabelën e rezultateve të zgjedhjeve në dorë, për të provuar se ka më shumë ndjekës se protesta përballë.
