Autoriteti i vetëshpallur i Ngushticës së Gjirit Persik në Iran ka njoftuar se Ngushtica e Hormuzit do të jetë e hapur për lundrim, por vetëm për anijet që respektojnë procedurat e përcaktuara nga ky organ.
Sipas njoftimit, anijet që dëshirojnë të kalojnë duhet të paraqesin kërkesat e tyre të paktën 48 orë përpara tranzitit dhe në përputhje me kushtet e vendosura nga autoriteti.
Organi bëri të ditur gjithashtu se për 60 ditët e ardhshme nuk do të aplikohen tarifa kalimi, në përputhje me periudhën e armëpushimit të parashikuar në marrëveshjen mes SHBA-së dhe Iranit.
Megjithatë, autoriteti paralajmëroi se nuk do të shqyrtojë asnjë kërkesë të paraqitur përmes kanaleve që nuk konsiderohen zyrtare.
Ngushtica e Hormuzit mbetet një nga korridoret detare më të rëndësishme në botë për transportin e naftës dhe gazit, ndaj çdo zhvillim që lidhet me funksionimin e saj ndiqet me vëmendje nga tregjet ndërkombëtare.
Autoriteti i Ngushticës së Gjirit Persik është një organ i vetëshpallur mbikëqyrës, i cili nuk gëzon njohje ndërkombëtare. Më herët, Shtetet e Bashkuara kanë vendosur sanksione ndaj këtij institucioni, ndërsa Sekretari amerikan i Thesarit, Scott Bessent, e ka cilësuar atë si "një shaka" dhe ka paralajmëruar subjektet ndërkombëtare kundër bashkëpunimit me të.
