Autoritetet belge kanë lëshuar një urdhër arresti evropian ndaj Dimitris Avramopoulos, ish-Komisioner Evropian dhe deputet aktual, në kuadër të hetimeve për skandalin e njohur si Qatargate.
Sipas mediave greke, Avramopoulos dyshohet për përfshirje në një organizatë kriminale, ndërsa hetuesit po shqyrtojnë një përfitim financiar prej rreth 73 mijë eurosh që lidhet me çështjen.
Burimet bëjnë me dije se ish-komisioneri ishte thirrur për të dëshmuar para autoriteteve belge rreth një vit më parë, por nuk ishte paraqitur. Mospjesëmarrja e tij në procedurat hetimore raportohet se është konsideruar si një faktor rëndues, duke çuar në lëshimin e urdhrit evropian të arrestit.
Hetimi fokusohet në bashkëpunimin e tij me një organizatë joqeveritare të themeluar nga ish-eurodeputeti Antonio Panzeri, një nga figurat kryesore të përfshira në skandalin Qatargate. Sipas informacioneve të publikuara, pas përfundimit të mandatit si Komisioner Evropian, Avramopoulos ka ofruar shërbime për këtë organizatë, duke përfituar një pagesë mujore prej 5 mijë eurosh.
Shuma totale e këtyre pagesave, që sipas raportimeve arrin në rreth 73 mijë euro, po analizohet nga autoritetet belge si pjesë e hetimit për rrjedhën e fondeve dhe lidhjet e mundshme me rrjetin e dyshuar të ndikimit politik që qëndron në qendër të skandalit.
