Presidenti i Shteteve të Bashkuara, Donald Trump, ka shprehur pakënaqësi ndaj aleatëve të NATO-s, duke deklaruar se vendet evropiane nuk po e vlerësojnë mjaftueshëm kontributin amerikan për mbrojtjen e tyre.
Në një intervistë për Tgcom24, Trump komentoi një postim të fundit në rrjetin e tij social Truth Social, ku kishte kritikuar kryeministren italiane Giorgia Meloni dhe rolin e Italisë brenda NATO-s.
“Jo vetëm me Italinë, por jam i zhgënjyer me të gjithë NATO-n. SHBA po trajtohet shumë keq”, u shpreh Trump, duke shtuar se disa vende evropiane nuk po marrin përsipër barrën e tyre në fushën e mbrojtjes.
Presidenti amerikan theksoi se disa aleatë të NATO-s “kanë vepruar keq” ndaj Shteteve të Bashkuara, ndërsa ngriti sërish shqetësimin për shpenzimet që Uashingtoni kryen për sigurinë e Europës.
I pyetur nëse SHBA mund të tërhiqet nga NATO, Trump shmangu një përgjigje të drejtpërdrejtë, duke deklaruar: “Nuk dua t’ju them”.
