Tensione dhe përplasje janë regjistruar në kantierin e Aeroportit të Vlorës, pasi punonjësit e kompanisë “MABCO” të Behgjet Pacollit dhe nënkontraktorët e saj janë futur me forcë në ambientet e projektit, duke pretenduar të drejtën e administrimit pas një vendimi të Gjykatës së Lartë.
Punonjësit e “MABCO” janë përballur me rojet e sigurisë të kompanisë “2A” të Valon Ademit. Mes palëve ka pasur përplasje verbale dhe fizike, ndërsa kishte thirrje të vazhdueshme “Dilni përjashta”.
Pas konfrontimit, grupi i punonjësve të Pacollit ka hyrë në kantier dhe ka nxjerrë jashtë punonjës të tjerë që ndodheshin në zonë.
Një ditë më parë, përmes një deklarate publike, Behgjet Pacolli bëri të ditur se kompania “MABCO” zotëron 98% të kuotave të kapitalit të VIA-s dhe përbën subjektin kryesor mbajtës të të gjitha detyrimeve, përgjegjësive dhe ekspozimeve që lidhen me koncesionin e Aeroportit të Vlorës.
Sipas Pacollit, “MABCO” mban ekspozimin financiar kryesor në këtë projekt, në një vlerë që tejkalon 310 milionë euro.
Ai paralajmëroi gjithashtu se çdo veprim ose mosveprim që pengon zbatimin e vendimeve të Asamblesë së datës 18 qershor 2026 do të konsiderohet shkelje e rëndë e detyrimeve ligjore dhe do të sjellë pasoja civile dhe penale për personat përgjegjës.
