Trupi i pajetë që u gjet në një humnerë në fshatin Cerrujë të Elbasanit pak ditë më parë, që dyshohet se i përket Eglant Koçit, vijon ende të mbahet në morgun e Tiranës në pritje të përfundimit të ADN-së.
Me vendim të prokurorit, ADN-ja e viktimës është duke u krahasuar me ADN-në e nënës së Eglant Koçit dhe nëse rezulton e përputhshme, trupi do t’i dorëzohet familjes.
Policia thotë se nga rrobat, si dhe një vragë në trup për shkak të një operacioni, nuk ka dyshime se trupi i përket 34-vjeçarit, por do t’ia dorëzojë familjes pasi të përfundojë krahasimi i profileve gjenetike të ADN-së.
Eglant Koçi u zhduk pa gjurmë më 4 qershor dhe pak ditë më vonë policia deklaroi se ishte vrarë nga miku i tij Armand Shakaj, që është shpallur tashmë në kërkim.
Në pranga është Enea Zyferi, që dyshohet të ketë përkrahur autorin e dyshuar të mbajtjes peng dhe vrasjes së 34-vjeçarit.
Shakaj ende nuk është arrestuar, pavarësisht aksioneve të policisë. Vrasja dyshohet të ketë motiv përplasjen për kriptomonedhat.
