Elvis Koçi, alias Elvis Çaushllari, i njohur si “Vis Korçari”, u arrestua mbrëmjen e djeshme nga policia e Sarandës.
34-vjeçari dyshohet si anëtar i një grupi kriminal me rrezikshmëri të lartë në qytetin e Elbasanit.
“Në momentin e ndërhyrjes, ky shtetas ka tentuar të largohet, por është neutralizuar dhe arrestuar nga shërbimet e Policisë”, thuhet në njoftim.
Vis Korçari ishte shpallur në kërkim, pasi Gjykata e Posaçme e Apelit për Korrupsionin dhe Krimin e Organizuar ka lënë në fuqi vendimin e Gjykatës së Posaçme të Apelit, e cila e ka dënuar me 4 vjet burgim për veprat penale “Grup i strukturuar kriminal” dhe “Sigurimi i kushteve dhe mjeteve materiale për të kryer vrasje”, ndërsa atij i kanë mbetur për të vuajtur 2 vjet, 9 muaj dhe 9 ditë burgim.
