Bisedimet mes Iranit dhe Shteteve të Bashkuara në Zvicër janë pezulluar përkohësisht, por nuk kanë përfunduar, ka bërë të ditur një burim iranian për Reuters.
Sipas raportimeve, delegacioni iranian është larguar nga vendi i takimit në shenjë proteste ndaj deklaratave të fundit të presidentit amerikan Donald Trump.
Një anëtar i ekipit negociator iranian tha se Teherani është i pakënaqur me kërcënimet e Uashingtonit dhe paralajmëroi se nuk do të ketë bisedime për çështje të tjera nëse nuk ndalet konflikti në Liban.
Tensionet u rritën pasi Trump deklaroi se SHBA-ja do ta godiste Iranin “shumë fort përsëri” nëse nuk ndalon aktivitetet e aleatëve të saj në rajon.
Presidenti amerikan iu referua Hezbollahut, grupit të mbështetur nga Irani në Liban, i cili vazhdon shkëmbimin e zjarrit me Izraelin.
Megjithëse negociatat nuk janë ndërprerë zyrtarisht, largimi i delegacionit iranian shihet si një sinjal i qartë i përkeqësimit të klimës mes palëve në një moment delikat për diplomacinë rajonale.
