Gazetari i News24, Osman Stafa, ka denoncuar në polici një incident që, sipas tij, ka ndodhur pas fjalimit që mbajti në protestën e qytetarëve në Tiranë.
Sipas informacioneve paraprake, ngjarja ka ndodhur gjatë marshimit të protestuesve drejt Qytetit Studenti, ku gazetari është përballur me provokime dhe ofendime nga dy persona.
Në momentin e incidentit, Stafa ndodhej së bashku me një koleg, i cili ka deklaruar se një çift bashkëshortësh e kanë ofenduar gazetarin për shkak të profesionit të tij.
Për të shmangur përshkallëzimin e situatës, kanë ndërhyrë persona të tjerë të pranishëm në marshim, të cilët kanë njoftuar edhe policinë.
Pas ndërhyrjes së efektivëve, një burrë dhe një grua janë shoqëruar në komisariat, ndërsa gazetari Osman Stafa ka depozituar kallëzim në Komisariatin nr. 3 në Tiranë.
Njoftimi policisë:
Tiranë/Informacion
Më datë 21.06.2026, rreth orës 22:00, pranë sheshit “Skënderbej”, është njoftuar Policia për një konflikt ndërmjet disa shtetasve.
Menjëherë në vendngjarje kanë ndërhyrë shërbimet e Komisariatit të Policisë Nr. 3, të cilat kanë parandaluar përshkallëzimin e konfliktit dhe kanë shoqëruar në Komisariat personat e përfshirë.
Konkretisht, shtetasin O. S., gazetar, i cili ka kallëzuar se është sharë, ofenduar dhe gërvishtur nga shtetasit Z. N. dhe M. P., duke pësuar dëmtime të lehta.
Nga ana tjetër, shtetasit Z. N. dhe M. P. kanë deklaruar se konflikti ka nisur pas një debati verbal me shtetasin O. S., pasi ky i fundit u ka kërkuar llogari lidhur me mospraninë e tyre në tubimin e zhvilluar në qytet.
Në lidhje me këtë rast po kryhen veprimet procedurale dhe hetimore, në bashkëpunim me Prokurorinë.
