Ish-ministrja e Jashtme, Elisa Spiropali, ka përcjellë një mesazh të fortë për Partinë Socialiste, duke kërkuar reflektim dhe vetëpastrim në kuadër të asaj që e quan “Marrëveshja e Re për Shqipërinë”.
Në një postim publik, Spiropali thekson se Shqipëria që synohet të ndërtohet duhet të jetë më e hapur, më e drejtë, më meritokratike dhe më europiane, por për këtë, sipas saj, vetë PS-ja duhet “të mbledhë mendjen”.
“Partisë Socialiste i duhet të gjejë forcat, të mbledhë mendjen, të vetëpastrohet, të bëhet më dinamike, më demokratike, më kompakte, për të mbetur gjithmonë e re, gjithmonë e pastër, pa smërçe, pa ndryshqe, pa pehlivanllëqe”, shkruan Spiropali.
Ajo nënvizon se “Marrëveshja e Re për Shqipërinë” duhet të jetë “e madhe, e thellë dhe e vërtetë”, duke shtuar se “po nuk lartësuam veten, nuk mund ta përmirësojmë vendin”.
