Shqiptarët e ardhur nga diaspora, të cilët iu bashkuan protestës së kësaj të shtune në Tiranë, kanë vendosur të kalojnë natën në sheshin para Kryeministrisë, duke ftuar të gjithë qytetarët që dëshirojnë t’u bashkohen në vijim të protestës.
“Diaspora do ta gdhijë në shesh”, bëjnë të ditur burime nga protestuesit. Pas përfundimit të fjalimeve, pjesëmarrësit vendosën të vijojnë me një marshim rreth godinës së Kryeministrisë dhe Piramidës së Tiranës, në një akt me simbolikën e rrethimit të institucionit.
Kjo e shtunë shënon ditën e 21-të të protestës së aktivistëve dhe qytetarëve kundër qeverisë. Pjesëmarrja e shqiptarëve të ardhur nga diaspora ka sjellë një rritje të ndjeshme të numrit të protestuesve të mbledhur para Kryeministrisë.
