Për të 22-ën ditë radhazi, protestuesit që kërkojnë dorëheqjen e kryeministrit Edi Rama kanë vijuar qëndresën para Kryeministrisë, ndërsa një pjesë e tyre e kaluan natën në bulevardin “Dëshmorët e Kombit”.
Në prononcimet për A2 CNN, protestuesit deklaruan se nuk do të tërhiqen deri në largimin e kryeministrit, ndërsa i bënë thirrje SPAK-ut të ndërhyjë dhe të marrë masa ndaj Edi Ramës. Ata vlerësuan gjithashtu mbështetjen e diasporës, të cilën e konsideruan një shtysë për të vazhduar protestën.
Ndërkohë, po shqyrtohet mundësia që protesta të hyjë në një fazë të re përshkallëzimi. Burime nga rrethi i organizatorëve flasin për bllokime të pjesshme të institucioneve dhe të disa akseve rrugore në Tiranë gjatë ditës së diel, megjithatë këto informacione mbeten ende të pakonfirmuara zyrtarisht.
Mbetet për t’u parë nëse organizatorët do të kërkojnë autorizimet përkatëse dhe nëse paralajmërimet për bllokime do të konkretizohen.
