Kombëtarja e Iranit ka lënë një mesazh falënderimi në dhomat e zhveshjes të stadiumit “SoFi” në Los Anxhelos, duke shprehur mirënjohje për mikpritjen e qytetit gjatë Kampionatit Botëror.
Gjesti simbolik erdhi pas barazimit 0-0 ndaj Belgjikës, një rezultat që i mban ende gjallë shpresat e iranianëve për kualifikim në fazën me eliminim direkt.
“Nga Persia e lashtë e mijëra viteve më parë deri te Irani i qytetëruar i ditëve të sotme, shpirti i Iranit mbetet i gjallë dhe i palëkundur. Faleminderit Los Anxhelos për mikpritjen tuaj. Erdhëm me krenari, garuam me nder dhe largohemi me dinjitet”, thuhet në mesazhin e shkruar me dorë dhe të publikuar nga Federata Iraniane e Futbollit.
Los Anxhelosi ka qenë qyteti pritës për të dy ndeshjet e Iranit në Grupin G, por skuadra nuk është akomoduar në SHBA. Ajo ka udhëtuar për çdo ndeshje nga baza e saj në Tijuana të Meksikës, për shkak të kufizimeve të vendosura nga autoritetet amerikane për qëndrimin e ekipit në territorin amerikan.
Këto kufizime kanë bërë që një pjesë e stafit dhe zyrtarëve të federatës iraniane të mos lejohen të hyjnë në SHBA. Autoritetet amerikane kanë deklaruar se kushtet e udhëtimit të ekipit janë ende nën shqyrtim, ndërsa po diskutohen mundësi për lehtësimin e disa prej masave ekzistuese.
Në vijim të mesazhit, futbollistët kanë falënderuar tifozët iranianë që, sipas tyre, dhanë “zemrën, zërin dhe shpirtin” për ekipin gjatë dy ndeshjeve, duke e mbyllur letrën me një thirrje për paqe, respekt dhe miqësi mes kombeve.
Trajneri i Iranit, Amir Ghalenoei, ka kritikuar vazhdimisht kufizimet ndaj ekipit, duke theksuar se skuadra është përballur me vështirësi që, sipas tij, nuk i kanë përjetuar kombëtaret e tjera pjesëmarrëse në Botëror.
Irani, i cili barazoi 2-2 me Zelandën e Re në ndeshjen e parë në “SoFi”, do të luajë ndeshjen e fundit të grupit kundër Egjiptit në Seattle.
Mesazhi u publikua pavarësisht tensioneve të regjistruara në stadium, ku himni kombëtar iranian u fishkëllye edhe në ndeshjen ndaj Belgjikës, pas një atmosfere të ngjashme edhe ndaj Zelandës së Re.
Para ndeshjes, spikeri i FIFA-s u bëri thirrje tifozëve të “duartrokasin për paqen”, por reagimi mbeti i vakët. Ndërkohë, jashtë stadiumit u mblodhën rreth 300–500 protestues, të cilët protestuan kundër qeverisë iraniane dhe politikave të saj.
