Pamje të rënda janë publikuar në rrjetet sociale nga përplasjet e sotme në Tiranë, ku një i ri shfaqet i dëmtuar dhe transportohet në krahë nga efektivët e policisë. Bëhet fjalë për Ledion Ballën nga Librazhdi, i cili nuk ishte pjesëmarrës në protestë, por kalimtar. Dyshohet se ai ka pësuar thyerje të këmbës gjatë ndërhyrjes policore. Në pamjet e publikuara nuk shihet asnjë autoambulancë apo personel mjekësor që t’i japë ndihmën e parë.
VNA mësoi se Ledion Balla është transportuar në Spitalin e Traumës, ku është futur menjëherë në sallën e operacionit. I riu ka qenë i vetëdijshëm, ndërsa ende nuk ka informacion të konfirmuar për shkallën e dëmtimeve dhe rrethanat e sakta në të cilat është lënduar.
Por ajo që bie në sy është mënyra se si policia e ka transportuar studentin e dëmtuar. Në vend që në pamje të shihet dhënia e ndihmës së parë, efektivët e mbajnë të riun në ajër, duke e larguar nga vendngjarja. Ngjarja është një tjetër episod shqetësues nga protesta e 13 tetorit, e cila u shoqërua me përplasje të forta mes studentëve dhe forcave të rendit në kryeqytet.
