Bota pritet të kalojë brenda vetëm pak vitesh pragun kritik prej 1.5 gradësh Celsius të ngrohjes globale krahasuar me periudhën para-industriale, ka paralajmëruar Programi i Kombeve të Bashkuara për Mjedisin.
Pragu prej 1.5°C është një nga objektivat qendrore të Marrëveshjes së Parisit dhe prej vitesh konsiderohet kufiri që vendet duhet të përpiqen të mos e tejkalojnë në mënyrë afatgjatë.
Sipas UNEP, kalimi i këtij niveli do të sjellë ngjarje ekstreme të motit më të shpeshta dhe më intensive, ndërsa do të shtojë presionin mbi ekosistemet dhe akullnajat.
Një tjetër shqetësim i madh është rritja e nivelit të detit dhe rreziku për qytetet dhe komunitetet që ndodhen në zonat e ulëta bregdetare.
OKB nuk thotë se rikthimi nën pragun 1.5°C është matematikisht i pamundur. Por mundësia konsiderohet tashmë shumë e pasigurt.
Për ta arritur atë, vendet do të duhej të reduktonin me shpejtësi dhe në shkallë të gjerë emetimet e gazeve serrë dhe, njëkohësisht, të përdornin metoda për largimin e një pjese të dioksidit të karbonit që tashmë ndodhet në atmosferë.
Paralajmërimi vjen pas një vere të karakterizuar nga valë ekstreme të të nxehtit, zjarre dhe përmbytje në pjesë të ndryshme të botës, ndërsa katastrofa e fundit në Himalaje ka rikthyer vëmendjen edhe te rreziku që përbën destabilizimi i akullnajave.
