Autostrada Tiranë-Durrës do të bllokohet përkohësisht në të dyja drejtimet për tre net radhazi, për shkak të punimeve që po zhvillohen në një prej akseve më të ngarkuara të vendit.
Autoriteti Rrugor Shqiptar (ARRSH) njoftoi se kufizimi i qarkullimit do të zbatohet gjatë orëve të natës, nga ora 23:00 deri në 05:00 të mëngjesit.
Bllokimi lidhet me vijimin e punimeve për projektin e zgjerimit të Superstradës Tiranë-Durrës, në kuadër të Fazës III. Gjatë këtij intervali do të realizohet montimi i trarëve metalikë në hapësirën qendrore të mbikalimit të ri të Kasharit, ndërhyrje që kërkon ndërprerjen e përkohshme të trafikut.
Për drejtuesit e mjeteve që udhëtojnë mes Tiranës dhe Durrësit, qarkullimi do të devijohet në rrugët dytësore gjatë gjithë kohës që autostrada do të jetë e mbyllur.
Një skemë e veçantë devijimi është parashikuar për mjetet e tonazhit të rëndë. Kamionët do të orientohen në rrugë alternative që në nyjën e hyrjes së kryeqytetit, për të shmangur krijimin e radhëve pranë zonës ku po kryhen punimet.
Ndërkohë, automjetet që udhëtojnë në drejtim të Rinasit, Shkodrës dhe Kosovës do të orientohen përmes mbikalimit Kashar-Thumanë.
ARRSH u kërkon drejtuesve të mjeteve të tregojnë kujdes, të respektojnë sinjalistikën e përkohshme dhe të ndjekin itineraret alternative gjatë orarit të kufizimit të qarkullimit.
