Zef Mazi, dikur një nga bashkëpunëtorët më të ngushtë të kryeministrit Edi Rama dhe njeriu që u zgjodh prej tij si kryenegociatori i parë i Shqipërisë me Bashkimin Evropian, ka shënuar një kthesë të plotë në qëndrimet e tij, duke dalë hapur kundër linjës qeverisëse dhe politikave evropiane.
Në një reagim të bërë në rrjetin social X, Mazi ka lëshuar akuza të forta, duke e cilësuar vizitën e Presidentes së Komisionit Evropian, Ursula von der Leyen, si një përpjekje për të shuar protestat dhe duke e quajtur atë "thjesht të turpshme".
Sipas tij, BE-ja ka qëndruar në mënyrë të papërgjegjshme e shurdhër për pesë muaj, ndërsa situata në vend kërkon një zgjidhje urgjente që vjen nga dëgjimi i zërit të popullit.
Në mesazhin e tij të plotë në X, Mazi shkruan:
"Vizita e Von der Leyen në Shqipëri ishte për të vrarë protestën, thjesht e turpshme, BE-ja ka qenë në mënyrë të papërgjegjshme e shurdhër për 5 muaj, është e papërfillshme [e parëndësishme]. Kaosi i Shqipërisë ka vetëm një emër dhe dalja prej tij është-dëgjoni zërin e popullit, veproni siç duhet. Sa më gjatë të vazhdojë, aq më keq do të jetë, rezultati do të jetë i njëjtë por dhimbja më e madhe."
Ky qëndrim i ashpër dëshmon çarjen përfundimtare të rrugëve mes kryeministrit Rama dhe ish-kryenegociatorit të tij, i cili tashmë pozicionohet si një zë kritik ndaj qeverisjes aktuale dhe qasjes së ndërkombëtarëve ndaj zhvillimeve në Shqipëri.
