Ndërsa në Kuvend zhvilloheshin debate për një nga çështjet më të rënda të sigurisë kombëtare, atë të ish-drejtoreshës së SHISH, Vlora Hyseni, deputetja e Partisë Socialiste, Ilva Gjuzi, është filmuar duke bërë “shopping” online nga telefoni.
Pamjet, të publikuara në rrjetet sociale, tregojnë deputeten socialiste të ulur në sallën e seancës plenare, teksa në ekranin e telefonit shfaqen produkte të ndryshme, në dukje këpucë apo artikuj mode, ndërkohë që në Kuvend diskutohej për skandalin që ka përfshirë ish-kreun e shërbimit sekret.
Në një moment kur opozita kërkonte përgjegjësi politike dhe sqarime për depërtimin e dyshuar të krimit në strukturat më të larta të shtetit, pamjet e deputetes duke përdorur telefonin për blerje online kanë krijuar perceptimin e një indiference të hapur ndaj debatit parlamentar.
Videoja është shpërndarë me ironi në rrjet, duke u shoqëruar me komente se “shteti le të bjerë, po pa këpucë të reja nuk rrihet”.
