Mbrëmjen e sotme ka pasur një moskoordinim mes organizatorëve të protestës në Tiranë lidhur me vijimin e marshimit, pasi fillimisht u njoftua se nuk do të kishte lëvizje nga sheshi. Në përfundim të fjalimeve, një nga aktivistët deklaroi se “sheshi është i juaji” dhe se nuk ishte marrë vendim për marshim, duke argumentuar se pjesëmarrja ishte masive dhe nuk kontrollohej.
Megjithatë, pak më vonë vendimi ndryshoi dhe protesta vijoi me marshim fillimisht me destinacion drejt Komisariatit Nr. 3 në Tiranë, ku ndodhen të arrestuar disa qytetarë nga protesta e së enjtes para Parlamentit, dhe më pas në rrugët kryesore të kryeqytetit. Aktualisht, marshimi vazhdon i organizuar nga aktivistët.
Kjo situatë vjen në një moment tensionesh dhe mosdakordësish mes disa grupeve organizatore, përfshirë edhe qëndrime të ndryshme mbi “Kuvendin Kombëtar të qytetarëve” të shpallur më herët.
Megjithatë, është konfirmuar se nesër në orën 09:00 protestuesit do të mblidhen para Gjykatës së Tiranës, ku pritet të dalin para masave të sigurisë të arrestuarit e protestës së fundit.
