Ish-kryetarja e LSI, Monika Kryemadhi, është paraqitur sot në ambientet e Prokurorisë së Posaçme së bashku me nënën e saj për t’u njohur me akuzat e ngritura ndaj tyre. Në një moment jashtë protokollit, Kryemadhi kërkoi me humor që nëna e saj të mos kalonte në skaner, duke thënë se i çekuilibrohen rrahjet e zemrës. Ajo falënderoi gazetarët që, sipas saj, ishin treguar të kujdesshëm një ditë më parë.
Duke komentuar situatën me nota personale, Kryemadhi tha se e ëma është më “snapjere” se ajo vetë, ndërsa kujtoi se i ka ngjarë babait, i cili sipas saj, është përjashtuar dhe pranuar disa herë nga partia për shkak të të folurit pa doreza. Me këtë stil të drejtpërdrejtë, ish-deputetja e opozitës ironizoi edhe natyrën e akuzave të ngritura ndaj saj dhe familjes.
Kryemadhi u shpreh e qetë për procesin, duke deklaruar se do të përfaqësohet nga një ekip i mirë avokatësh dhe se është e bindur për pafajësinë. “Të gjithë dëshmitarët nuk kanë thënë asgjë kundër meje, as Ilir Metës dhe as mamasë sime,” – tha ajo, duke shtuar se kur çështja të shkojë në gjykatë, ndoshta nuk do të jetë e nevojshme të shfaqet vetë.
