Kryetari i Partisë Demokratike, Sali Berisha, ka reaguar ashpër ndaj draftit të ri të Kodit Penal, të prezantuar nga qeveria javën e kaluar, duke e cilësuar si një përpjekje për të goditur qytetarët dhe për të mbrojtur zyrtarët. Në një konferencë për mediat, Berisha deklaroi se ky draft nuk është produkt i ndonjë konsultimi publik apo bashkëpunimi me institucionet ligjore, por “i dalë nga shpellat e mafies dhe zyrat e Edi Ramës”.
Ai theksoi se Shqipëria ka ndërtuar ndër vite një kuadër ligjor të standardeve evropiane, që nga Kodi i parë Penal i vitit 1995 e deri te ai aktual i vitit 2014, i hartuar me ndihmën e ekspertëve ndërkombëtarë. Ndaj, sipas tij, vendosja për ta ndryshuar atë pa mbushur as 10 vjet, e aq më tepër në mënyrë të fshehtë, tregon për “interesa të mprehta të shtetit mafioz dhe karteleve të drogës”.
“Ky nuk është një kod për qytetarët, as për drejtësinë. Është një akt që synon mbrojtjen e strukturave kriminale që mbajnë në këmbë regjimin e Ramës,” tha Berisha, duke akuzuar qeverinë për mungesë transparence dhe konsultimi me grupet e interesit.
