Kryeministri deklaroi sot se shumë shpejt vendi do të ketë një Kryeinspektoriat Digjital, një strukturë e re që synon të godasë ndërtimet pa leje, këtë herë jo me sy të lirë, por me sy nga qielli – satelitët Albania 1 dhe Albania 2.
Sipas kreut të qeverisë, ky institucion do të shërbejë si një “mburojë teknologjike” për të monitoruar çdo ndërtim në territorin shqiptar, duke përdorur imazhe satelitore për të evidentuar shkeljet urbanistike në kohë reale.
“Jemi në epokën digjitale, nuk ka më vend për ndërtues fantazmë që sfidojnë ligjin dhe qytetin,” u shpreh Kryeministri në një konferencë për shtyp. “Kryeinspektoriati Digjital do të jetë syri i pazëshëm mbi çdo kantier të paligjshëm.”
Nga ana tjetër, qytetarët nuk janë lënë jashtë këtij "sistemi inteligjent", njofton kreu i qeverisë. Sipas njoftimit, qytetari digjital mbetet ende një nga hallkat më të rëndësishme në zinxhirin e kontrollit, duke pasur mundësi të bëjë denoncime dhe të ndjekë zhvillimet përmes platformave online.
“Dhe hajde mos i beso premtimeve…" sepse në fakt realiteti ka treguar që teksa satelitë e dronë ngrihen në qiell për të monitoruar, në tokë bëhet kërdia.
Ndërtimet që mbijnë kudo, pallate e sheshe të tëra që bllokohen, të cilat mesa duket janë me bekimin e qeverisë.
Por kryeministri më shumë se të ngrejë sytë nga qielli, bën mirë të kontrollojë administratën në çdo nivel të saj, pikë së pari veten si kryetar i Këshillit Kombëtar të Territorit.
