Fatmir Xhafaj ka shpërfillur temperaturat e larta të fundkorrikut dhe ka vendosur të organizojë sot një mbledhje të Komisionit të Drejtësisë që ai drejton. Sikundër VNA e kishte paralajmëruar në fundjavë, Xhafaj prezantoi sot një draft prej 29 faqesh që përbën nismën e re ligjore për parandalimin e konfliktit të interesit për funksionarët shtetërorë.
Por nëse zyrat e Kuvendit ofrojnë mjaftueshëm freski për të zhvilluar mbledhje, Kushtetuta nga ana tjetër është e qartë dhe e “ftohtë” në 12 muajt e vitit, teksa përcakton se Parlamenti, në asnjë dimension të tij, nuk mund të mblidhet pas përfundimit të sesionit parlamentar, përveç rasteve të jashtëzakonshme apo fatkeqësive natyrore.
Ndoshta zhvillimet e ditëve të fundit mund të jenë të jashtëzakonshme për Xhafajn dhe arsye e fortë që ai të tregojë “dhëmbët” si ligjvënës përpara organeve të drejtësisë. Por nëse Kushtetuta flet ftohtë, mendjet e nxehta të politikës nuk po humbin kohë për të shfaqur ambiciet e tyre për të vënë në kontroll organet e drejtësisë. Që mund të kenë sigurisht problematikën e tyre, por që në asnjë rast nuk mund të jenë Xhafaj dhe shokët e tij të partisë rregullatorët. Ish-ministri i Brendshëm i Edi Ramës u largua nga posti pikërisht për shkak të konfliktit të interesit që lidhej me të vëllain e tij të dënuar në Itali dhe që nuk ekstradohej pikërisht pse ishte vëllai i njeriut me pushtet politik. Ndaj diskutimi i sotëm, përveçse i pavend dhe ekstraligjor, cenon edhe vërtetësinë mbi të cilën ndërtohet një projektligj.
Fatmir Xhafaj dhe komisioni i drejtuar prej tij për shumë muaj me radhë nuk i fshehu tentativat për të futur duart te reforma në drejtësi, duke u përpjekur të vërë nën kontroll disa nga institucionet e reja, kryesisht SPAK dhe GJKKO. Edhe pse Edi Rama e ndoqi debatin për këtë komision së largu dhe nuk u përfshi asnjëherë zyrtarisht në punën e tij, ai paralajmëroi se komisioni do të vijojë punën edhe në legjislaturën e ardhshme.
Ndërkohë, raporti i fundit i Komisionit Europian, në një paragraf të veçantë, kritikonte ngritjen dhe funksionimin e komisionit special të drejtuar nga Fatmir Xhafaj. Që mesa duket, i qëndron besnik mësimeve të partisë së tij që e ka brumosur me idenë se Europa nuk është për t’u marrë shumë në konsideratë kur bëhet fjalë për punët e përbrendshme të partisë-shtet.
