Sot Komisioni Qendror i Zgjedhjeve shpërndan mandatet për deputetët e zgjedhur në qarkun e Tiranës. Por, ndryshe nga subjektet e tjera, për koalicionin “Nisma Shqipëria Bëhet” procesi mbetet i pezulluar për shkak të përplasjeve të brendshme mes drejtuesve të tij.
Zvarritja e certifikimit të rezultateve erdhi pas rinumërimit të disa qendrave votimi, si rrjedhojë e ankesave nga Partia Demokratike për manipulime, megjithatë rinumërimi nuk solli ndryshime në rezultatet përfundimtare.
Tashmë, vendimi për mandatin e vetëm të “Shqipëria Bëhet” i takon kreut të KQZ-së, Ilirjan Celibashi. Në zyrat e KQZ ndodhet sot edhe përfaqësuesja ligjore e koalicionit, Dorina Prethi, si dhe kandidatja e renditur e katërta në listën e mbyllur, Kleana Xhuveli, e cila ka revokuar dorëheqjen e saj për të kërkuar mandatin.
Xhuveli, kushërira e parë e Adriatik Lapajt, është kthyer në një pikë tensioni, pasi deklarata e saj për të hequr dorë nga dorëheqja është bërë pas afatit ligjor. Ndërkohë, përfaqësuesja ligjore e koalicionit thekson se, përderisa KQZ nuk ka refuzuar zyrtarisht dorëheqjet, ato konsiderohen të pranuara.
Nga ana tjetër, Celibashi ka deklaruar se, në mungesë të një vendimmarrjeje brenda afatit, dorëheqjet konsiderohen të vlefshme dhe kandidatët në fjalë nuk kanë më të drejtë të pretendojnë mandatet.
Për më tepër, një tjetër emër i diskutueshëm është ai i Zeqir Kordhonit, i cili ka kërkuar të marrë mandatin, por për të është ngritur dyshimi për falsifikim dokumentesh dhe mospërputhje nënshkrimesh, çka ka detyruar KQZ-në të pezullojë përkohësisht ndarjen e mandatit për këtë subjekt.
Ndërkohë, edhe Partia Socialdemokrate e Tom Doshit ka kërkuar dorëheqjen e të gjithë kandidatëve të listës së mbyllur në Tiranë, ku mandatin e vetëm e ka fituar Albana Pëllumbi. Me shkresën e depozituar, kërkohet që mandati t’i kalojë kandidatit të parë të listës së hapur, Tedi Mula, i cili ka marrë 2,503 vota.
Të dyja çështjet – ajo e Lapajt dhe Doshit – janë shtyrë për diskutim në fund të mbledhjes së sotme.
Përplasjet në “Shqipëria Bëhet” vijnë pas një marrëveshjeje të brendshme, ku kandidatët e listës së mbyllur ishin familjarë të drejtuesve dhe kishin firmosur paraprakisht dorëheqjet e tyre, për t’i hapur rrugë kandidatëve të listës së hapur. Më i votuari në këtë listë ishte Adriatik Lapaj. Por tashmë, përballë tentativës së Zeqir Kordhonit për të marrë mandatin, Lapaj dhe Shabani janë përfshirë në një konflikt të hapur publik.
