Deputetja e Partisë Demokratike, Ina Zhupa, në një deklaratë për mediat është shprehur se partia do të zhvillojë analizën e humbjes në zgjedhjet e 11 majit gjatë muajit shtator. Ajo theksoi se analiza duhet të jetë e thellë, gjithëpërfshirëse dhe konstruktive, duke shmangur përplasjet e brendshme të panevojshme.
“Ka qenë gjithçka e vënë në përdorim për marrjen e votës. Është detyrë që ta demaskojmë këtë proces, por njëkohësisht në shtator duhet të kthehemi në analizën tonë të brendshme – çfarë duhet të bëjmë më mirë. Energjia duhet të fokusohet në rregullimin e situatës së brendshme, më shumë sesa tek farsa zgjedhore”, u shpreh Zhupa.
Sipas saj, analiza do të përfshijë çdo aspekt të funksionimit të partisë dhe nuk do të shmangë asnjë diskutim. Megjithatë, ajo theksoi se kjo nuk duhet të shndërrohet në një “luftë shtrigash”.
“Çdo gjë do të diskutohet me përgjegjësi, jo për të bërë luftë, sepse nuk fitojmë asgjë me përplasje të brendshme. Duhet të kuptojmë se cila është formula fituese, kush janë njerëzit dhe cilat janë modalitetet që na japin më shumë mundësi për një betejë të suksesshme, edhe përballë një shteti elektoral”, theksoi deputetja demokrate.
Pavarësisht qëndrimeve për analizë dhe reformim të brendshëm, Zhupa, ashtu si shumë përfaqësues të tjerë të PD-së, nuk përmendi emra konkretë për mbajtjen e përgjegjësisë pas humbjes. Ajo nuk e përmendi as zbatimin e statutit të partisë nga ana e kryetarit, i cili sipas rregullores duhet të japë dorëheqjen pas një humbjeje të thellë elektorale.
