Nëse kushërinjtë e Adriatikut paskan dhënë dorëheqje nga kandidimi, pse e paskan pasur emrin në fletën e votimit?
Adriatik Lapaj sot i ka nisur një letër tjetër Komisionerit Shtetëror të Zgjedhjeve. Ajo që është interesante në tekstin e letrës është “argumenti” që Adriatiku përdor kësaj rradhe për të bindur Komisionerin se mandati i vetëm i takon atij. Sipas Adriatikut, kandidatët e familjeve të 3 anëtarëve të vetëm të “Shqipëria Bëhet”, që u shit për koalicion, paskan dhënë dorëheqjen nga KANDIDIMI.
Siç e kemi sqaruar edhe më parë, Komisioneri Shtetëror i Zgjedhjeve bën shkelje të Kodit Zgjedhor nëse kapërcen listën e mbyllur dhe ndan mandate drejtpërdrejt tek lista e hapur. Kodi Zgjedhor dhe Rregullorja e Kuvendit nuk i njeh akrobacitë që Adriatiku kërkon të njihen si teknikë e re për t’ja fut Kodit. Se Kodi është i qartë, i heshtur dhe kokëfortë sa i takon kësaj çështje.
Adriatiku në fillim tha se kandidatët paskam dhënë dorëheqje nga mandati që s’e kishin marrë akoma. Që është njësoj si të shesësh një pronë që nuk e ke blerë akoma. Nëse e bën, quhesh mashtrues dhe askush nuk ka debat në atë rast. Sa i takon këtij argumentit të ri “për t’ja fut Kodit”, sipas të cilit fiset e tre hileqarëve të Shqipërisë qenkan dorëhequr “nga kandidimi”, është po aq qesharak. Një pronë as nuk e dhuron dot nëse nuk je njohur fitues i të drejtave të pronësisë mbi të.
Gjithashtu, nëse kandidatët e listës së mbyllur qenkan dorëhequr nga kandidimi, atëherë pse nuk qenkan zëvendësuar me të tjerë në fletën e votimit? Kodi Zgjedhor është i qartë se pa listë të mbyllur nuk mund të ketë listë të hapur. Nëse ata qenkëshin dorëhequr nga kandidimi, atëherë Koalicioni i hileqarëve nuk mund të regjistrohej në zgjedhje. Ose do duhej t’i drejtohej për ndihmë kushërinjve të tjerë më të besueshëm, se për anëtarësi u kuptua që nuk kanë.
Sa i takon Komisionerit Celibashi, derisa fiset kanë emrat në fletën e votimit, do të thotë që të paktën ai këtë pjesën e “dorëheqjeve” nga kandidimi e lexon dhe kupton siç duhet. Komisioneri nuk i ka njohur dorëheqjet nga kandidimi. Nëse kushërinjtë dhe Adriatiku i lexojnë ato letra si “dorëheqje nga kandidimi”, atëherë sa kohë të gjithë emrat figurojnë në fletën e votimit, do të thotë që ato copa letrash janë njohur si të pavlefshme nga KQZ.
Fleta ku kanë votuar shqiptarët i ka gjithë kushërinjtë të printuar njëri pas tjetrit. Hileqarët që u nisën në zgjedhje me lista kandidatësh sikur po bënin lista dasme, tani duhet të hedhin vallen sipas muzikës së Kodit Zgjedhor.
