Kryeministrja italiane Giorgia Meloni ka ndërmarrë një hap të pazakontë për t’u mbrojtur nga keqpërdorimi i inteligjencës artificiale, duke kërkuar regjistrimin e zërit të saj si markë në Bashkimin Europian.
Meloni ka paraqitur kërkesën pranë Zyrës së Bashkimit Europian për Pronësinë Intelektuale (EUIPO). Në dosje është përfshirë një regjistrim audio prej vetëm katër sekondash, ku ajo përsërit dy herë në italisht frazën e njohur “Io sono Giorgia Meloni” – “Unë jam Giorgia Meloni”. Kërkesa rezulton aktualisht në shqyrtim.
Qëllimi është forcimi i mbrojtjes ligjore kundër klonimit të zërit të kryeministres përmes inteligjencës artificiale dhe krijimit të materialeve “deepfake”, të cilat mund t’i atribuojnë asaj deklarata që nuk i ka bërë. Regjistrimi i zërit si markë nuk do të ndalonte automatikisht imitimet e krijuara nga AI, por mund t’i japë Melonit një instrument shtesë ligjor kundër përdorimeve të paautorizuara.
Fraza e zgjedhur nuk është rastësore. Ajo lidhet me deklaratën e famshme të Melonit në një tubim politik të vitit 2019 dhe më pas u përdor edhe si titull i autobiografisë së saj të vitit 2021.
Kryeministrja italiane është përballur më parë me materiale të manipuluara të krijuara me inteligjencë artificiale. Në vitin 2024 ajo nisi gjithashtu një betejë ligjore kundër një personi të akuzuar për krijimin dhe publikimin e imazheve pornografike “deepfake” duke përdorur portretin e saj; çështja vijon në gjykatat italiane.
Regjistrimi i paraqitur në EUIPO lidhet me kategori që përfshijnë përmbajtje multimediale të shkarkueshme, aktivitete kulturore dhe organizimin e manifestimeve politike.
