Një pjesëtar i Trupave të Marinës së Shteteve të Bashkuara është arrestuar në Okinawa të Japonisë, pasi dyshohet për vrasjen e një gruaje, trupi i së cilës u gjet në një hotel. Viktima është identifikuar si Yagi Anna, 39 vjeçe, ndërsa i dyshuari është Devin Jacob Ballard, 20 vjeç, një marins amerikan i stacionuar në bazën ajrore të Marinës amerikane Futenma në Okinawa.
Trupi i gruas u gjet në orët e para të mëngjesit të së shtunës në një hotel në qytetin Naha, kryeqendra e prefekturës së Okinawas.
Kryeministrja japoneze Sanae Takaichi e cilësoi ngjarjen si një krim “brutal dhe të tmerrshëm”, duke iu referuar rastit si grabitje dhe vrasje. Ajo deklaroi se i ka kërkuar palës amerikane të vendosë masa më të rrepta disiplinore për personelin e saj ushtarak në Japoni.
Edhe ministri japonez i Mbrojtjes, Shinjiro Koizumi, reagoi ashpër pas ngjarjes.
“Një incident i tillë është absolutisht i pafalshëm dhe më mbush me indinjatë të thellë”, deklaroi ai.
Koizumi theksoi se incidentet dhe aksidentet ku përfshihen pjesëtarë të ushtrisë amerikane shkaktojnë shqetësim të madh në komunitetin lokal dhe nuk duhet të ndodhin.
SHBA: Po bashkëpunojmë me autoritetet japoneze
Trupat e Marinës së SHBA-së konfirmuan se po bashkëpunojnë me autoritetet japoneze lidhur me akuzat për veprime të rënda kriminale nga një marins. Pala amerikane gjithashtu shprehu ngushëllime për familjen e viktimës. Ambasada e SHBA-së në Tokio deklaroi se po bashkëpunon plotësisht me qeverinë japoneze dhe policinë lokale. Ministria e Jashtme e Japonisë bëri të ditur se ambasadori amerikan George Glass u thirr të dielën për të diskutuar mbi incidentin.
Zemërim në Okinawa
Ngjarja ka shkaktuar reagime të forta edhe në Okinawa, një territor ku ndodhen disa baza ushtarake amerikane dhe dhjetëra mijëra pjesëtarë të forcave amerikane. Guvernatori i Okinawas, Genta Koja, deklaroi se autoritetet lokale i kanë kërkuar vazhdimisht SHBA-së të marrë masa për parandalimin e incidenteve të tilla. Sipas tij, rasti i fundit ngre sërish pikëpyetje serioze mbi disiplinën e personelit ushtarak amerikan.
“Fakti që një ngjarje e tillë ka ndodhur përsëri nuk na lë zgjidhje tjetër veçse të arrijmë në përfundimin se përpjekjet e ushtrisë amerikane për ruajtjen e disiplinës, edukimin e personelit dhe masat e tjera janë krejtësisht joefektive”, deklaroi guvernatori.
Hetimet për vrasjen po vazhdojnë, ndërsa 20-vjeçari amerikan mbetet i dyshuar për krimin. Autoritetet japoneze pritet të zbardhin më tej rrethanat dhe motivin e ngjarjes.
