Kreta po përballet prej tre ditësh me mot të keq, me reshje të dendura dhe stuhi që kanë shkaktuar përmbytje dhe dëme në banesa, sipërfaqe bujqësore dhe infrastrukturë.
Vetëm gjatë 24 orëve të fundit janë regjistruar rreth 22 mijë goditje rrufeje, ndërsa fenomenet intensive pritet të vazhdojnë edhe gjatë ditës së sotme.
Sipas meteorologëve grekë, pjesa veriore e ishullit pritet të jetë ndër zonat më të prekura, ndërsa orët në vijim konsiderohen më kritiket për shkak të intensitetit të reshjeve dhe stuhive.
Shirat e rrëmbyeshëm pritet të vazhdojnë deri në pasditen e sotme. Më pas parashikohet një dobësim gradual i fenomeneve, me përmirësime të herëpashershme të kushteve atmosferike deri në mëngjesin e nesërm.
Moti i keq ka shkaktuar probleme në disa zona të Kretës, ku uji ka përmbytur rrugë dhe prona, ndërsa dëme janë raportuar edhe në të mbjella dhe në infrastrukturë.
Autoritetet u kanë bërë thirrje banorëve të tregojnë kujdes dhe të shmangin lëvizjet e panevojshme në zonat ku ekziston rreziku i përmbytjeve dhe rrëshqitjeve të dheut.
