Sali Berisha ka dalë sot hapur në mbrojtje të mandatit të Sonila Bejtes në Gjykatën Kushtetuese. Në dalje nga SPAK, ku sot u paraqit në bazë të procedurës njëherë në dy javë, ai sulmoi kryetarin e Gjykatës së Lartë, Sokol Sadushi, se po tenton të largojë nga Gjykata Kushtetuese persona me mandat 8-vjeçar. Në fakt, i vetmi “person” me mandat të përfunduar, por që ende GJK nuk ka shpallur vakancën, është ai i Sonila Bejtes. Kjo e fundit, së bashku me kryetaren në detyrë, Holta Zacaj, në bashkëpunim me Elisa Spiropalin, kanë tentuar që, nëpërmjet artificës së mandatit të Elsa Toskës (e dorëhequr), të zgjasnin dhe mandatin e tyre. Ndërsa Zacaj duket se u tërhoq pas furtunës që shkaktoi veprimi i saj për të mos shpallur vakancën, tashmë mandati i Sonila Bejtes është bërë flamuri i PD, që po kërkon me çdo kusht të ruajë karrigen e saj në Gjykatën Kushtetuese.
