Komisioni Xhafaj për reformën e reformës në drejtësi pritet të mblidhet javën e ardhshme për të vijuar punën e tij, edhe pse zyrtarisht Parlamenti ka përfunduar punën e tij në këtë legjislaturë.
Burime të VNA bëjnë me dije se janë planifikuar të paktën dy tryeza në nivel ekspertësh, për të cilat nuk dihet me siguri se çfarë do të diskutohet, ndërkohë që puna e këtij komisioni ka qenë e kritikuar që nga dita e parë nga partnerët ndërkombëtarë. Komisioni Evropian, në raportin zyrtar të publikuar më 8 korrik 2025 për gjendjen e sundimit të ligjit në Shqipëri, ka adresuar kritika të forta ndaj punës së komisionit parlamentar për thellimin e reformave në qeverisje të mirë, sundimin e ligjit dhe luftën kundër korrupsionit, të drejtuar nga Fatmir Xhafaj.
Edhe pse raporti thekson se puna e këtij komisioni duhet të jetë e hapur, transparente, gjithëpërfshirëse dhe të ruajë frymën e reformës ekzistuese, pa u kthyer në një instrument politik që minon pavarësinë e institucioneve të drejtësisë, kjo duket se nuk është marrë në konsideratë nga qeveria dhe kryeministri, që me gjasë nuk kanë humbur kohë për të rinisur nga puna për reformën mbi reformën në drejtësi.
Në sinkron me Sali Berishën dhe partinë e drejtuar prej tij, tashmë Komisioni Xhafaj i bashkohet idesë për të “reformuar” reformën, duke pasur si mbështetje edhe pakënaqësitë e mëdha të PD me Prokurorinë e Posaçme.
Interesant është fakti që Komisioni Xhafaj mblidhet në ditët e fundit dhe të nxehta të korrikut, ku i vetmi zhvillim i rëndësishëm në institucionet e reja mbetet zgjedhja e kreut të ri të BKH. Pas largimit të Aida Hajnajt, personazh i përfolur për lidhje me Fatmir Xhafajn, tashmë nuk duket e largët dita dhe ora kur presioni qeveritar të jetë prezent mbi garën që po zhvillohet për kreun e ri të BKH.
Me gjasë, Komisioni Xhafaj do të rindezë fitilin e ndryshimeve të reformës në shtator, me Parlamentin e ri që nis nga puna me një mazhorancë më të konsoliduar në numra se ajo e kaluara. Çka pritet të sjellë një dinamikë të re edhe në procedurën për zgjedhjen e kreut të ri të SPAK – procedurë që nis në fund të tetorit dhe, sigurisht, është qershia mbi tortën e qeverisë, që tashmë është thuajse e gjitha pjesë e lakmisë së saj. Jo vetëm për pushtet politik, por edhe për të shtrirë tentakulat mbi drejtësinë, segmente të posaçme të së cilës – në SPAK – janë të vetmet që ia prishin terezinë mazhorancës së konsoliduar në zgjedhjet e 11 majit.
