Edi Rama ka ndërruar sot xhaketën nga kryepolic i territorit në kryeteknikun e sigurisë kibernetike. Në një takim në Berat, Edi Rama mori përsipër të sigurojë shqiptarët se qeveria e tij ka ngritur institucione që monitorojnë dhe sigurojnë hapësirën kibernetike.
Kryeministri nënvizoi se ndërsa institucionet publike po përforcojnë mbrojtjen në hapësirën kibernetike, sektori privat nuk po ecën me të njëjtin ritëm:
“Ekspozimi ndaj sulmeve kibernetike dhe ndërkohë që po përforcojmë dita ditës mbrojtjen tonë në sektorin publik, jemi të shqetësuar se në sektorin privat nuk po ecën me të njëjtin ritëm dhe këtu ne përsëri mund të ndërtojmë mekanizmat për mbrojtje“, u shpreh Rama.
Në fakt, totalisht jashtë realitetit dhe fakteve, Edi Rama ndoshta ka harruar se sulmet kibernetike ndaj institucioneve shqiptare janë kaq flagrante sa nuk kanë ndodhur në asnjë vend të zhvilluar të Europës. Të dhënat e shqiptarëve janë sheshit, sulmet kibernetike jo më larg se dy javë më parë bllokuan shërbimet e bashkisë së Tiranës. Ndërsa e-Albania është një faqe ku më shumë se shërbime gjen paqartësi dhe bllokime online.
Edi Rama nuk duket shumë familjar me teknologjinë, por ndoshta dikush duhet t’i kujtojë se institucioni përgjegjës për sigurinë kibernetike në Shqipëri është AKSH, që më shumë se për kibernetikën është i përfolur për tenderat. Se sa për sigurinë, është e kotë të flasësh.
