Ish-presidenti Ilir Meta ka reaguar ashpër pas vendimit të Gjykatës së Apelit për të lënë në burg, duke e cilësuar procesin ndaj tij si pjesë të një "telenovele të turpshme" me regji politike.
Në një reagim për mediat, Meta shprehu mirënjohje për avokatin e tij, Kujtim Cakrani, për përpjekjet në sallën e gjyqit, duke nënvizuar se “ka harxhuar dy orë frymë për ata që nuk kanë as veshë të dëgjojnë e as integritet për të respektuar Kushtetutën”.
Ai sulmoi ashpër Prokurorinë e Posaçme SPAK, duke e akuzuar se është nën ndikimin e mazhorancës socialiste. “SPAK-u është në përgjim permanent të urdhrave nga tribuna e PS-së. Nuk kanë asnjë provë, s’kanë gjetur ndonjë, as kanë për të shpikur dot”, deklaroi Meta.
Lideri i Partisë së Lirisë përmendi sërish çështjen CEZ-DIA, për të cilën pretendon se është përdorur për ta shantazhuar gjatë kohës që mbante detyrën e Presidentit, duke përfshirë edhe emra si Edi Rama, Altin Dumani dhe ish-agjentin e FBI-së, Charles McGonigal.
Sipas Metës, ata që e akuzojnë janë vetë ata që kanë “fshehur prova, intimiduar dëshmitarë dhe i kanë kthyer në vegla të pushtetit”.
