Autoritetet italiane kanë kryer një kontroll të befasishëm në banesën dhe zyrën e arkitektit të njohur italian Stefano Boeri, president i Trienales së Milanos dhe mik i kryeministrit të Shqipërisë, Edi Rama. Ky veprim është pjesë e një hetimi mbi dhënien e lejeve të ndërtimit në kushte të dyshimta në qytetin e Milanos.
Sipas mediave italiane, kontrollet janë zhvilluar nga policia në kuadër të një hetimi që ka çuar në arrestimin e disa zyrtarëve të bashkisë së Milanos. Dyshimet janë se leje ndërtimi janë përshpejtuar ose janë miratuar përmes ndërhyrjes së funksionarëve dhe figurave të njohura publike. Deri më tani, ndaj Boerit nuk është marrë asnjë masë ndalimi.
Në një deklaratë zyrtare, Prokurori i Përgjithshëm i Milanos, Marcello Viola, ka folur për një “ekspansion të pakontrolluar urbanistik me përmasa të jashtëzakonshme”, ndërsa janë pezulluar disa kantiere ndërtimi dhe po shqyrtohen masa të reja sigurie.
Boeri ka qenë më parë subjekt i një hetimi tjetër në janar 2024, lidhur me tenderin për Bibliotekën Europiane të Informacionit dhe Kulturës. Ndaj tij ishte vendosur masa e arrestit shtëpiak, e cila është revokuar më pas.
Në Shqipëri, emri i Stefano Boerit është i lidhur me disa nga projektet më të mëdha të zhvillimit urban të dekadës së fundit, përfshirë planin rregullues “Tirana 2030”. Ai është gjithashtu autor i projekteve si Tirana Riverside, Parku Arkeologjik i Durrësit, disa shkolla publike në kryeqytet dhe ndërtesa të reja në zonat qendrore të Tiranës.
Studioja e tij në Tiranë, e hapur në vitin 2022, ka qenë përfituese e disa kontratave publike me vlerë të konsiderueshme financiare, disa prej të cilave janë lidhur përmes negocimit të drejtpërdrejtë. Për tri prej këtyre projekteve, të ardhurat e përfituara arrijnë rreth 840 mijë euro.
Në gusht 2023, Studio Boeri në bashkëpunim me firmën lokale Son Engineering, fitoi edhe një konkurs të organizuar nga Bashkia e Tiranës për projektimin e një kulle në zonën e Bulevardit të Ri, si dhe një kontratë për projektimin e godinës së re të Drejtorisë së Përgjithshme të Transportit Rrugor.
