Adriatik Lapaj ka reaguar pasi Zeqir Kordhoni ka vendosur të mos heqë dorë nga mandati i deputetit, duke i mbyllur rrugën për në Kuvend në shtator.
“Është angazhuar gjithë këneta si e si të mos shkoj unë në Kuvend. Po sa tmerr më keni?! O të mjerë, unë nuk pranoj shantazh e as shitem,” shkruan Lapaj, duke hedhur akuza të drejtpërdrejta ndaj Zeqir Kordhonit, të cilin e quan “dajo i Endrit” dhe ndaj vetë Endri Shabanit, me të cilin deri pak kohë më parë ndante të njëjtin front opozitar.
Lapaj thekson se Shabani, që sipas tij kishte dalë garant për hapjen e listave, sot po punon për familjarët e tij, duke i mbyllur rrugën përfaqësimit atij dhe ekipit të “Lëvizjes Shqipëria Bëhet”.
“Qameti do ndalojnë mua të shkoj në Parlament. Populli do gjykojë,” shkruan Lapaj, duke shtuar se ndaj tij dhe krejt ekipit të tij po konsumohet padrejtësi publike.
Reagimi i Lapajt erdhi pasi Zeqir Kordhoni, pjesë e listës së mbyllur të koalicionit “Nisma Shqipëria Bëhet” në Tiranë, i dërgoi një letër Komisionit Qendror të Zgjedhjeve, ku deklaroi se nuk do të heqë dorë nga mandati i deputetit në rast se shpallet fitues, duke injoruar çdo deklaratë të mëparshme të koalicionit për dorëzimin e mandatit.
Ky vendim i Kordhonit duket se ka thelluar përçarjen mes Lapajt dhe Shabanit, duke i ndarë përfundimisht rrugët e bashkëpunimit opozitar, në një moment ku përballja me listat e mbyllura dhe garën e brendshme për mandate ka krijuar tensione të hapura në kampin e opozitës.
