Më 19 dhjetor 2024, gjatë një interpelance për zonat e mbrojtura dhe investimet strategjike, ministrja e Turizmit dhe Mjedisit, Mirela Kumbaro, mburrej publikisht me zhvillimin e Thethit:
“Shikoni Thethin e paimagjinueshëm, që sot kemi 2000 shtretër në bujtina, që vijnë vetëm për ekoturizëm, vetëm për natyrën.”
Sipas ministres, ndryshimet ligjore ishin bërë pikërisht që bizneset lokale të kishin mundësi zhvillimi në këtë zonë të mbrojtur, duke e kthyer Thethin në një simbol të ekoturizmit shqiptar.
Por vetëm disa muaj më vonë, pamjet nga Thethi tregojnë një realitet krejt tjetër. Sot, IKMT ka shembur rreth 80 objekte pa leje në këtë zonë, me urdhër të qeverisë, duke lënë pas ndërtesa të rrënuara dhe pronarë që e shohin me pasiguri të ardhmen e investimeve të tyre.
Nga njëra anë, qeveria ka inkurajuar zhvillimin e turizmit malor duke përdorur Thethin si shembull suksesi në investimet lokale, ndërsa nga ana tjetër, ndërhyrja e forcave të IKMT ka sjellë një mesazh të kundërt për të njëjtët investitorë që u ftuan të investonin me premtimin e zhvillimit të zonës.
Sa shtretër kanë mbetur sot në Theth? Pyetja mbetet pa përgjigje. Ajo që dihet është se një pjesë e strukturave ku ndodhej ky kapacitet që vetë qeveria e përdorte për të promovuar suksesin e turizmit në zonat e mbrojtura, sot janë rrënuar si ndërtime pa leje.
