Një valë dorëheqjesh nga administratorët e njësive administrative dhe drejtuesit vendorë është shënuar në disa bashki kryesore të vendit, pas kërkesës së kryeministrit Edi Rama për dorëheqjen dhe rivlerësimin e performancës së tyre.
Në Bashkinë Shkodër, të gjithë administratorët e 10 njësive administrative kanë paraqitur dorëheqjen pranë institucionit. Lajmi është konfirmuar nga burime zyrtare në bashki, ku theksohet se dorëheqjet do të shqyrtohen në kuadër të procesit të përgjithshëm të rivlerësimit të punës së tyre.
Ndërkohë, në Bashkinë Lushnje, zëvendëskryeministrja dhe drejtuesja politike e PS për qarkun Fier, znj. Belinda Balluku, gjatë një takimi me drejtues vendorë, ka kërkuar dorëheqjen e të gjithë drejtorëve të bashkisë dhe 13 administratorëve. Bashkia e Lushnjes ka gjithsej 15 njësi administrative, por në dy prej tyre vendet e administratorëve janë vakante. Burime zyrtare bënë të ditur se pas dorëheqjes do të ngrihet një komision i posaçëm për vlerësimin e performancës së secilit drejtues, proces nga i cili do të vendoset nëse ata do të vijojnë detyrën apo do të largohen përfundimisht.
Në Fier, dorëheqjet kanë përfshirë të gjithë administratorët e 14 njësive administrative, si dhe drejtues të bashkisë e drejtorive rajonale. Edhe këtu, sipas praktikës së unifikuar, pas dorëheqjeve do të nisë vlerësimi i detajuar i punës së tyre.
Në Bashkinë Gjirokastër, 7 administratorë të njësive Gjirokastër, Cepo, Lazarat, Lunxheri, Antigone, Odrie dhe Picar kanë paraqitur dorëheqjen. Kryetari i bashkisë, z. Flamur Golemi, konfirmoi se deri në marrjen e vendimeve përfundimtare mbi qëndrimin ose shkarkimin e tyre, administratorët do të vijojnë të kryejnë detyrat funksionale.
Edhe Bashkia Durrës është përfshirë nga dorëheqjet masive. Administratorët e pesë njësive administrative – Ishëm, Sukth, Manëz, Katund i Ri dhe Rrashbull – kanë dhënë dorëheqjen. Bëhet fjalë për Kadri Gjylin, Edlir Cërrin, Muharrem Sulën, Eltion Prenin dhe Albert Bukaçin. Po ashtu, janë larguar nga detyra edhe administratorët e gjashtë rajoneve të qytetit bregdetar: Roland Çobani, Ilir Ngresi, Myslym Hasanaj, Davide Ndoi, Jurgen Tabaku dhe Jetmir Pupla.
Procesi i dorëheqjeve dhe vlerësimit të performancës pritet të vijojë edhe në bashki të tjera në ditët në vijim, sipas orientimeve të qeverisë dhe kryeministrit Rama.
