Mandati i shumëpërfolur që i takon listës së “Shqipëria Bëhet” ka hyrë në një fazë groteske: përplasja nuk është më mes ideve, por mes lidhjeve familjare. Në njërën anë qëndron Ana Dajko, kandidatja e parë në listë dhe, sipas të gjitha gjasave, përfituesja legjitime e mandatit e renditur para Kordhonit. Në tjetrën, Zeqir Kordhoni, i renditur në vendin e nëntë në versionin përfundimtar të listës, i cili është dajë i Endrit Shabanit dhe i vendosur aty thjesht si një “mbushës” i listës monentin e fundit.
Por historia duket se po merr një tjetër kthesë: Ana Dajko rezulton të jetë kushërirë e Adriatik Lapajt, ndoshta mund të marrë mandatin e Shqipëria Bëhet.
Tani gjithçka është shndërruar në një duel absurd familjar: dajë kundër kushërire, në një garë që përfaqëson më shumë mungesën e thellë të etikës politike sesa alternativën qytetare që kjo lëvizje pretendoi të sillte. Nëse mandati përfundon në duart e Ana Dajkos, Lapaj do të përballet me kritikën se çoi në Parlament një të afërme, ndonëse të paktën ka mbajtur premtimin për të mos marrë vetë mandatin e vetëm të partisë së tij. Nëse, përmes ndonjë interpretimi të debatueshëm ligjor apo tërheqje të Anës mandati i shkon Zeqir Kordhonit, atëherë “Shqipëria Bëhet” do të ketë dërguar në Kuvend dajën e një kandidati tjetër, me të cilin është ndarë pas një lufte të gjatë për moralin në politikë.
Kush do fitojë në fund?
Ajo që është e sigurt, është se idealet me të cilat u mbështoll kjo lëvizje janë sfumuar nën hijen e lidhjeve familjare dhe manovrave teknike. Mbetet të shihet nëse ky mandat do t’i përkasë ligjit, moralit apo farefisnisë. E sigurt është që Shqipëria nuk mund të bëhet me hile dhe lojëra të tilla. Na mjaftojnë të vjetërit që kanë 30 vjet me të tilla manovra që mbajnë vendin peng.
