Adriatik Lapaj nuk është e thënë të jetë budalla!
Fakti që një nga kandidatët e listës së mbyllur nga ata shumë familjarë, miq e komshinj që u shtuan si pa të keq në zonën e listës së mbyllur të 12 Qarqeve, ka dalë pothuaj publikisht dhe po deklaron se pret, që nëse i vjen rradha, të pranojë mandatin e deputetit, nuk do të thotë detyrimisht që Adriatik Lapaj është budalla.
Bile edhe Pano Soko mund të mos jetë budalla!
Ata janë thjesht ca hileqarë, mbase edhe naivë, por jo detyrimisht budallenj.
Kur Pano me Tikun dhe me Endrin vunë në skenë teatrin e listave fake, (aspak tinëzisht por fare hapur), qëllimisht shpreheshin se të gjithë të tjerët, që po i gjykonim për falsitetin që po shisnin si sfidë ndaj Kodit Zgjedhor, ishin budallenj.
Me spote, reklama dhe në çdo dalje publike, Endri Shabani, Adriatik Lapaj dhe Pano Soko, mburreshin se kishin gjetur zgjidhjen për të sfiduar politikën e vjetër duke vënë në lojë Kodin Zgjedhor.
Hileja e Tikut me shokë, për fat zgjati më pak sesa procesi i ankimimeve, shqyrtimit dhe nxjerrjes së rezultatit përfundimtar të zgjedhjeve. E kjo sepse rrugës doli në skenë Daja më i famshëm i këtyre zgjedhjeve.
Daja Zeqir, i cili duhet të supozojmë që është edhe një nga votuesit e Adriatikut me shokë, rrugës e kuptoi që Kodi Zgjedhor e bënte atë deputet përpara Adriatikut.
Daj Zeqiri mbase i vjen rradha të marrë mandatin nëse 6 të tjerët që janë rreshtuar përpara tij në zonën e mbyllur, e refuzojnë atë pasi t’u akordohet nga Komisioneri Shtetëror i Zgjedhjeve.
Mbase Daj Zeqiri arrin të kapë autobuzin që do të mbushet me deputetët e rinj. Sigurisht nëse 6 të tjerët që janë para tij do refuzojnë të hipin në të.
Por në çdo rast Adriatiku duhet të presë disa stacione më pas. Tiku duhet të presë radhën.
Është e kotë që ta akuzosh Dajon e famshëm se po bën hilé. Dajës i kërkuan që t’ia vinin emrin në listë duke i shpjeguar hilenë që po i bënin “politikës së vjetër” dhe talljen me Kodin Zgjedhor.
Hilé për hilé, kësaj rradhe fiton Daja, sepse Daja ka Kodin Zgjedhor që ja mbështet “hilenë”.
Me Kodin Zgjedhor fiton Dajua.
Dhe kjo nuk do të thotë domosdoshmërisht që Adriatiku është budalla.
Ndërkohë Tiku bën mirë të gjejë “Dajën” e vet, mes atyre 6 kandidatëve që ka përpara Daja e Endrit.
Edhe zgjidhet përfundimisht ky muhabet sipas Kodit Zgjedhor.
