Gjykata e Apelit të Posaçëm shuan shpresat e ish-presidentit Ilir Meta për lirimin nga burgu.
Gjatë seancës gjyqësore, avokati i tij, Kujtim Cakrani, ia la në dorë gjykatës që të aplikojë një nga 7 masat e tjera të sigurisë, përveç arrestimit me burg, me qëllim që Meta të mos mbahet më në paraburgim.
Ndërkohë, prokurorët e posaçëm Arben Kraja dhe Sotir Kllapi kërkuan që Meta të vazhdojë të mbahet në arrest me burg, ku ndodhet prej 9 muajsh.
Ish-presidenti u arrestua në tetor të vitit 2024 gjatë një operacioni policor me urdhër të SPAK. Ai pretendon se arrestimi ishte në fakt një rrëmbim dhe se hetimet ndaj tij kanë prapavijë politike.
SPAK, nga ana tjetër, e akuzon për korrupsion, pastrim parash dhe fshehje pasurie.
Njoftimi
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Igerta Hysi, sot më 17.07.2025, shpalli vendimin mbi çështjen penale nr. 168 akti, datë 10.07.2025 regjistrimi, mbi ankimin e personit nën hetim I.M., me objekt: “Ankim ndaj vendimit nr. 391, datë 26.06.2025 të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: 1. Verifikim i kushteve të masës së sigurimit personal “Arrest me burg” për shtetasin I.M., akuzuar për veprat penale “Korrupsioni pasiv i personave që ushtrojnë funksione publike”, “Falsifikim i vulave, stampave ose formularëve”, “Pastrimi i produkteve të veprës penale. 2. Zëvendësimi i masës së sigurimit personal “Arrest në burg”, me një masë tjetër”, dhe vendosi:
- Miratimin e vendimit nr. 391, datë 26.06.2025 të Gjykatës së Posaçme të Shkallës së Parë për Korrupsionin dhe Krimin e Organizuar.
- Kundër vendimit lejohet rekurs në Gjykatën e Lartë brenda 45 ditëve, duke filluar ky afat nga e nesërmja e njoftimit të vendimit.
U shpall në Tiranë, sot më datë 17.07.2025.
