Në një kohë kur Partia Demokratike duhej të kishte bërë analizën e brendshme për humbjen e katërt dhe më të thellë në zgjedhjet e 11 majit, përfaqësuesit e saj në media vazhdojnë ende me tezën se SHBA është ajo që do të sjell ndryshimin në Shqipëri.
Të paktën këtë ka pretenduar deputeti i zgjedhur, Belind Këlliçi, i cili në një intervistë për mediat është shprehur se në muajt në vijim priten vendimmarrje të forta në SHBA dhe sipas tij do të prekin dhe Shqipërinë.
“Unë jam i bindur që në muajt në vijim do të kemi sërish vendimmarrje shumë të forta politike që prekin edhe SHBA-të, prekin dhe rajonin, prekin dhe Shqipërinë”, tha Këlliçi.
Madje, deputeti i PD për të qenë më bindës tek ata qytetarë që ende e besojnë këtë retorikë të vjetër dhe të dalë boje, tha se ende nuk ka ardhur radha e Shqipërisë për t’u trajtuar me prioritet në administratën amerikane.
“Në administratën amerikane kam përshtypjen ende nuk i ka ardhur radha Shqipërisë për t’u trajtuar me prioritet nga ata zyrtarë, nuk po them për presidentin e SHBA-ve, por ata të cilët monitorojnë të gjithë veprimtarinë e e institucioneve në Shqipëri”, tha më tej Këlliçi.
Deklaratat e Këlliçit dëshmojnë se në PD jo vetëm nuk ka vullnet për analizë dhe marrje përgjegjësish për humbjen, por nuk ka as përpjekje për të ndërtuar një narrativë të re që të motivojnë atë elektorat që u ka mbetur besnik.
Të pretendosh pas katër humbjeve radhazi se ndryshimi do vij nga SHBA, duke goditur Ramën, këtë vetëm Këlliçi mund ta besojë. Për më tepër kur dihet se problemin me SHBA i pari e ka kryetari i tij, i cili është ende person “non grata”.
Në fund të fundit, qytetarëve nuk u mbetet tjetër veçse të shpresojnë, bashkë me drejtuesit e PD-së, që “radha” e Shqipërisë në axhendën amerikane të mos vijë pas vitit 2029, pasi Edi Rama të ketë fituar edhe mandatin e pestë.
