Tensionet mes dy figurave kryesore të koalicionit “Nisma Shqipëria Bëhet”, Adriatik Lapaj dhe Endri Shabani, po marrin përmasa gjithnjë e më të mëdha, pasi të gjithë familjarët e listës së mbyllur po reagojnë për mandatin e vetëm të fituar nga koalicioni.
Një reagim i fundit ka ardhur edhe nga djali i Ana Dajkos, e cila është tezja e Adriatik Lapajt dhe njëkohësisht emri i parë në listën e koalicionit. Në një prononcim për Euroneës Albania, ai ka shprehur keqardhjen për situatën e krijuar, duke theksuar se, sipas tij, mandati duhet t’i përkasë Adriatik Lapajt dhe lëvizjes që ai drejton.
“Mandati i takon zotit Adriatik Lapaj dhe Lëvizjes ‘Shqipëria Bëhet’, pasi është më i votuari në listë. Nëna ime, Ana Dajko, së bashku me 45 kandidatë të tjerë, ka hequr dorë nga kandidimi përpara se të shpalleshin rezultatet. Çdo vendim i mëtejshëm i takon kryesisë së kësaj lëvizjeje,” – deklaroi ai.
Situata është përshkallëzuar edhe më tej pas publikimit të disa audio-regjistrimeve ku mbështetës të Lapajt dyshohet se kanë kërcënuar Endri Shabanin. Përplasjet u ndezën fillimisht pas tërheqjes së dajës së Shabanit, një kandidat i listës së mbyllur, nga dorëheqja e tij, duke ndryshuar rrjedhën e ngjarjeve brenda koalicionit.
Ndërkohë, partia e Lapajt ka bërë thirrje për rikthim në tryezën e bisedimeve për të rinegociuar marrëveshjen parazgjedhore. Por deri tani, nga ana e Shabanit dhe subjektit të tij politik, "Nisma", nuk ka asnjë reagim zyrtar.
