Në Gjykatën e Posaçme u zhvillua sot seanca për dosjen "Partizani", ku të pandehur kryesorë janë ish-kryeministri Sali Berisha dhe dhëndri i tij, Jamarbër Malltezi. Avokatët e z. Berisha kërkuan përjashtimin e trupit gjykues, duke argumentuar se gjyqtarët janë të njëanshëm.
Avokati Genc Gjokutaj deklaroi se gjyqtarët e posaçëm nuk mund të jenë të pavarur, pasi, sipas tij, janë nën përgjim nga SPAK dhe për këtë arsye nuk mund të bëjnë drejtësi në mënyrë të paanshme. Ai kërkoi që çështja të gjykohet nga gjyqtarë të juridiksionit të përgjithshëm.
Seanca u shty pasi një prej avokatëve kërkoi kohë për t’u njohur me aktet, dhe pritet të rifillojë në shtator, pas përfundimit të pushimeve vjetore të gjyqtarëve.
Sali Berisha është i pandehur për korrupsion të kryer në bashkëpunim, pasi akuzohet se ka favorizuar dhëndrin e tij në procesin e privatizimit të ish-klubit sportiv "Partizani".
