Mora oferta nga PS për qeverisje me bazë të gjerë – kështu ka deklaruar kreu i koalicionit “Shqipëria Bëhet” në emisionin “Debat” në A2 CNN. Sipas tij, në dy muajt e fundit ai ka marrë oferta nga Partia Socialiste, por theksoi se i ka refuzuar.
I sinqertë apo jo në deklaratën e tij, Lapaj praktikisht është bërë pjesë e “tregut” politik të mazhorancës, e cila, pasi ka siguruar një shumicë të madhe në parlament, tashmë ka hedhur grepin edhe tek ata pak deputetë që i përkasin opozitës. Meqë Lapaj, siç pretendon, paska refuzuar, pyetja që lind është: a ka pasur të njëjtën ofertë edhe Endri Shabani?
Dy ish-miqtë dhe bashkëpunëtorët prej disa javësh janë përfshirë në një debat banal për mandatin e vetëm të koalicionit “Shqipëria Bëhet”. Ndërsa hilja e shëmtuar që përdorën për listat e mbyllura është shndërruar në boomerang që nxori të palarat e një partie në shesh.
Nëse Rama ka joshur Lapajn me ofertë, a ka pasur Shabani të njëjtën ofertë? Dhe nëse po, cili ka qenë pazari i ofruar për të nga Edi Rama? Si Lapaj, edhe Shabani përdorën një retorikë të fortë ndaj mazhorancës gjatë fushatës elektorale. Megjithatë, kjo nuk ka qenë asnjëherë problem për ofertat e kryeministrit, të cilat i kanë pranuar edhe shumë “opozitarë” të tjerë.
Vendimi i KQZ-së për kujt i takon mandati dhe lëvizjet e radhës së Lapajt dhe Shabanit do të qartësojnë për publikun rezultatin e ofertës së bërë nga Edi Rama për koalicionin “Shqipëria Bëhet”. Sa për moralin e Lapajt dhe Shabanit, komentet janë të tepërta pas sherrit banal që dy të rinjtë e politikës i ofruan një publiku të lodhur dhe të bezdisur nga “mjeshtrit” që tashmë duket se kanë trajnuar mjaftueshëm të ashtuquajturit të rinjtë e politikës.
