"Tërë thelbi është se Kordhoni, daja i Shabanit, ka si qëllim që Adriatiku të mos vejë në Parlament dhe lista e hapur të mos aplikohet".
Kështu deklaroi sot kreu i “Shqipëria Bëhet”, Adriatik Lapaj, duke thënë se nuk ka problem kush e merr mandatin. Por sipas tij, nuk mund t’ja lëmë Kordhonit atë mandat që të shkojë e t’ja çojë Edi Ramës për të bërë 84 mandate.
Me këtë logjikë, Lapaj vë në dyshim të gjithë listën e mbyllur të partisë së tij, që me gjasë nuk do bënte opozitë por do shkonte te Edi Rama. I vetmi, ai vetë mund të konsiderohet si opozitar, sepse pjesa tjetër janë të dyshimtë për marrëdhënie me pushtetin.
“Rama ka tentuar që këto dy muaj të më çojë në vathën e vetë, por unë nuk kam pranuar. Kjo po bëhet për të më ndalur në këtë rrugë dhe ne si lëvizje, ne duam garë dhe meritokraci,” – tha Lapaj në një konferencë për shtyp.
Vështirë është të vërtetohet tentativat e Ramës, por sa për garë dhe meritokraci, koalicioni “Shqipëria Bëhet” tregoi qartas se në Shqipëri ata që konsideroheshin si të rinjtë bënë hile të shëmtuara po aq sa të vjetrit që mbajnë peng politikën për 30 vjet.
