Deputeti i Partisë Socialiste, Erion Braçe, ka reaguar me tone të ashpra ndaj një aksioni të zhvilluar nga administrata tatimore dhe Autoriteti Kombëtar i Ushqimit (AKU) në një baxho në Zharnec, Divjakë. Sipas tij, në përfundim të kontrolleve janë sekuestruar 33 mijë kg djathë dhe është vendosur një gjobë prej 40 milionë lekësh ndaj pronarit, vetëm pse nuk kishte faturat e qumështit të blerë nga blegtorët vendas.
“Divjakë, atje ku prodhohet qumështi. Ky nuk është rikthim i sigurisë ushqimore, kjo është varrosje e një punëtori. Nga e shtuna pasdite deri të martën në orën 02:00 të mëngjesit, tatimet dhe AKU ushtruan kontroll në baxhon e vogël të Tak Mebellit në Zharnec. Në përfundim i sekuestruan djathin, prodhim i muajve të tërë për sezonin turistik, dhe i vendosën një gjobë 40 milionëshe. I kanë kërkuar faturat e qumështit nga blegtorët, i kanë bërë inventar dhe do t’i marrin djathin e më pas edhe paratë,” – shkruan Braçe.
Deputeti socialist më tej ngre pikëpyetje mbi standardin e ndjekur nga autoritetet, duke aluduar se kontrolle të tilla nuk zhvillohen në fabrikat e mëdha të përpunimit të produkteve ushqimore. Ai akuzon se nëse do të kishte një standard të barabartë për të gjithë, shumë prej tyre do të duhej të përballeshin me masa penale për evazion fiskal.
Braçe pranon se problematika është thelluar pas skemës së re të TVSH-së, e cila u inicua nga Ministria e Bujqësisë në vitin 2018. Ai e quan atë një politikë të gabuar që ka penalizuar prodhuesit e vegjël dhe ka favorizuar aktorët e mëdhenj të tregut.
Në përfundim të reagimit të tij, Braçe i kërkon ndjesë pronarit të baxhos për faktin se nuk mund ta ndihmojë. “Më vjen turp,” shkruan ai.
Por pikërisht në këtë fjali qëndron edhe paradoksi më i madh i reagimit të tij. Një deputet i mazhorancës që kritikon zbatimin e politikave të qeverisë së vet, por që në fund thotë se është i pafuqishëm për të ndaluar padrejtësinë. Nëse Braçe nuk mund të bëjë asgjë, atëherë kush duhet të veprojë?
Çfarë vlere ka një mandat parlamentar nëse ai nuk përkthehet në mbrojtje konkrete për qytetarët?
Pse në 2018-ën nuk i doli hapur kundër apo të protestonte për vendimin e ministrit të bujqësisë që nxiste evazionin fiskal të fabrikave të mëdha?
Erion Braçe e di mirë që një status në Facebook nuk është reagim i mjaftueshëm përballë një sistemi që penalizon më të dobëtit dhe mbron më të fuqishmit. Sepse në fund, një reagim në rrjetet sociale, pa zgjidhje konkrete, mund të lexohet thjesht si një akt populist për të marrë klikime edhe nga qytetarët që po përballen me gjobat dhe jo si përpjekje serioze për të ndaluar abuzimin dhe arbitraritetin.
