VNA mësoi ditën e djeshme se Anuela Ristani, së bashku me dy nënkryetarë të tjerë të Bashkisë së Tiranës, pritet t’i bashkohen valës së dorëheqjeve që po ndërmerren në nivel vendor nga vetë kryeministri Edi Rama.
Kreu i qeverisë ka përgatitur terrenin gjatë një mbledhjeje me drejtuesit lokalë dhe deputetët e Tiranës, ku janë diskutuar edhe zëvendësimet për postet që do të mbeten bosh.
Ende nuk dihet zyrtarisht çfarë u është komunikuar konkretisht ministrave Belinda Balluku dhe Ogerta Manastirliu, dy figura me peshë brenda Partisë Socialiste dhe bashkëpunëtore të hershme të Ramës që nga koha kur ai drejtonte Bashkinë e Tiranës. Nuk përjashtohet mundësia që të kenë marrë një rol të posaçëm në këtë proces riorganizimi.
Ky zhvillim shihet gjithashtu si një hap drejt shpalljes së zgjedhjeve të reja për drejtuesin e Bashkisë së Tiranës.
Megjithëse zyrtarisht, vetëm Erion Veliaj, i cili është marrë i pandehur nga SPAK, ka kompetencën për të firmosur dorëheqjet dhe emërimet. Por burime pranë qeverisë pohojnë se Edi Rama synon të menaxhojë këtë proces pa përfshirjen e drejtpërdrejtë të kryebashkiakut në detyrë.
Në këtë mënyrë, duket se Rama po synon të ndërtojë një model të ri drejtimi vendor, me figura më të balancuara dhe më pak të fuqishme politikisht sesa paraardhësit.
