Kreu i Partisë Demokratike, Sali Berisha, i ka kërkuar me urgjencë Avokatit të Popullit të marrë takim me Ilir Metën, të cilin e cilëson si të burgosur politik, dhe të bëjë publike çdo qëndrim çnjerëzor që, sipas tij, është urdhëruar nga kryeministri Edi Rama dhe ministri i Drejtësisë, Ulsi Manja.
Berisha pretendon se ndaj Metës, ish-president dhe ish-kryeministër i vendit, po ushtrohen sjellje të papranueshme nga persona me uniformë brenda institucionit të vuajtjes së dënimit.
Në deklaratën e tij, Berisha denoncon gjithashtu të dhëna që, sipas tij, tregojnë për trajtim çnjerëzor edhe ndaj të burgosurit ordiner Erion Veliaj. “Partia Demokratike ka bërë me dhjetëra protesta kundër arrestimit të këtij delinkuenti, i cili është akuzuar për më pak se 20% të krimeve që ka kryer”, tha ai. Por, vijoi Berisha, trajtimi i çdo të burgosuri duhet të jetë në përputhje me standardet dhe kodin e trajtimit të të dënuarve, siç kërkohet nga Këshilli i Europës.
Ai u bëri thirrje institucioneve përgjegjëse të nisin një hetim të plotë edhe për rastin e Veliajt, duke theksuar se “çdo i burgosur gëzon të drejtat që i njeh ligji, pavarësisht cilësimit të tij penal”.
